Di Cypro, di sier Andrea Venier luogotenente, date a dì 30 octubrio in Nichosia. Come havia cargato su la nave di sier Andrea Soranzo e fradeli stera 14 milia orzi, qual partiva per Pisa. Item, mandoe alcuni avisi abuti da Rodi di sier Mario Malipiero era lì in Cypro; dice haver da Syo che hano da Costantinopoli de 24 septembre come l'armada [188] dil Turco si preparava, et il signor Turco haver fato tajar il naso e cavar li ochi a l'ambasador di Rodi; tamen non era il vero, perché avevamo più fresche letere da Costantinopoli di sier Andrea Griti che questo non dicea.
     
      In questo zorno intesi el re di romani ritrovarse al presente a Lochagna in Barbante dove è il studio, et suo fiol Philippo archiducha di Bergogna, qual ha anni 21, haver abuto un fiol con la moglie ch'è fiola dil re di Spagna, et questo intesi da sier Zorzi Pisani dotor e cavalier fo orator a esso re; et in collegio nulle letere.
     
      Da poi disnar fo gran consejo, et li savii si reduse per expedir li oratori di Candia; etiam alditeno li oratori di Antivari, qualli mostroe il modello di la terra, et come la voleano fortifichar, rechiedendo le intrade per fabrichar.
     
      [1498 12 10]A dì 10 dezembrio in colegio. Vene l'orator dil ducha di Urbin et disse tre cosse: primo, il ducha si doleva non havia alozamento in Bibiena, et era fato pocho caso di le sue opinion; secondo, non havia li danari di la paga se non l'ultimo di tutti; tertio era tempo di andar a le stanzie. Et per il principe li fo risposto sapientissimamente a tute le parte: quanto al primo, non volea li nostri proveditori far disordine; al segondo si scriveria li desse prima a lui la paga di altri; tertio dovesse farsi avanti e non andar a li alozamenti, et che credevamo fin questa hora fusse vicino a Fiorenza; et cussì fo scrito il tuto in campo e li desseno alozamenti a Bibiena e li danari di la paga et seguisse l'impresa virilmente.