Et è da saper, come eri fo levato una zanza per fiorentini in Rialto, li campi esser stati a le man, et esser stà morto el signor Bortolo d'Alviano, adeo tutta la terra si doleva di la sua morte più che di altra rota, tamen nulla fue.
     
      Da Milan di l'orator, di 6. Come el zorno avanti era zonto sier Domenego Trevixan el cavalier, vien orator nostro di Spagna, et il ducha li andò contra et ozi li dete audientia, et li disse molte parole zercha voler acordar le cosse di Pisa, et che la Signoria tramava contra di lui, et che lui darà Zenoa al re di Franza et renoncierà Milan a li electori de l'imperio, et che havia fato scriver assa' fiate a la Signoria questo suo bon voler et niuna risposta havea hauto, et che era stà messa la cosa di Pisa nel ducha di Ferara, tamen la Signoria non era ancor risolta, et si non si risolverà, sarà causa lui farà novi pensieri, et pregoe esso sier Domenego dicesse questo a la Signoria. Item, che per Milan si diceva à promesso ducati 50 milia per imprestedo a' [189] fiorentini, et il marchexe di Mantoa fin qui havea habuto ducati 40 milia; et come quel zorno medemo esso sier Domenego era partito, et il ducha lo accompagnoe con li oratori fino a le porte. Manda letere da Turin et da Lion.
     
      Da Turin di Zuam Dolze secretario, di 2. Come a dì 29 era zonto ivi sier Domenego Trivixam cavalier sopra dito, et insieme erano stati a la udientia di quel ducha Filiberto di Savoja, el qual mostroe esser amico di la Signoria nostra. Monsignor di Castel Vechio non era lì per esser in gran età. Visiterà monsignor el bastardo oferendosi per nome di la Signoria nostra, che prima ivi non era.