Da Sojano di sier Zuam Paulo Gradenigo, date adì ... Come ivi era arivato, et trovato quel signor conte haver bona volontà et gran animo, sichè farano fati. Et li tre contestabili Vicenzo di Naldo, Zuan da Feltre e Ramazoto da Bologna dimandavano danari per dar a li provisionati.
     
      Et fo scrito a Verona a li rectori mandasseno a Ravena quel resto di danari li havia portato Hieronimo di Monte da Mantoa; et a Ravena fo scrito zonti questi et il resto fin ducati 2000 se li manderà, qual debi mandarli al proveditor Gradenigo.
     
      Da Modom di sier Anzolo Gradenigo et sier Antonio Bon rectori, data adì ... novembrio. Zercha le specie retenute per sier Lucha Trun synico. Et scrisseno in favor di mercadanti quali erano quivi, et fo comesso questa cossa a li avogadori di comum.
     
      Da Damasco di sier Beneto Sanuto consolo nostro, di 10 octubrio. Cosse vechie et habute per avanti di quelle nuove dil paese; ringratia la Signoria di haver abuto licentia di repatriar, ma quel signor non havia voluto lassar partir fino non venga il sucessor; el soldam regna ancora; né altro da conto.
     
      In questa matina, sier Zorzi Corner el cavalier era cassier di colegio, si dolse a la Signoria come era stà levà una zanza per sier Polo Donado, oficial a la camera d'imprestidi, che lui per haver danari da [191] mandar in campo e altrove avia tolto ducati 10 milia deputati al monte vechio, et si doleva questo fusse ditto non lo havendo fato; et sier Alvixe Bragadin procurator savio di consejo si alteroe di parole con ditto sier Zorzi difendendo qual da cha Donado; tamen fu mandato per lui, factoli admonitione per el principe, et lui si scusoe non haver ditto, ma solum a quelli dimandava li pro diceva non haver denari et queste guerre esser caxon.