Et ha posto li diti scudi 200 milia per l'impresa di Milan, et li 100 milia che spera li darà la Signoria, qual basterà a l'impresa perché le zente d'arme ha il suo ordinario; di artilarie ne ha assai, mancha solum questi per le fantarie e spexe exstraordinarie; sichè sminuisse le spexe e scansa molte di zentilhomeni provisionati. Item, il re si volea partir et andar a Sinon, lige 25 de lì verso Bertagna. Item, quel Zuam Rosso monsignor di San Martin et Zuam Piero di Petra Santa non sono mai comparsi dal re; et essi oratori stavano atenti per disconzar le pratiche; et erano stati col re a la messa, qual li disse haver licentiato quelli do feva per il sig. Lodovico, qualli non li ha voluto udir. Item, che l'orator di Napoli iterum ha scrito vadi fuora dil suo regno et non vengi più avanti; et che altro non potea far soa majestà. Il fiol dil papa era zonto a Lion, a la fin dil mexe sarà a la corte. Item, esser venuto monsignor di Lignì di Bergogna, amico di la Signoria nostra, qual solicitava essi oratori a concluder con il re, e non si stesse per nulla, perché soa majestà dava un bel stato a la Signoria et gran paexe; risposeno essi li 100 milia ducati non esser cossa honorevele a la regia majestà a dimandar; et lui confortò per questo non si stesse né volse aceptar raxon niuna, et disse si la Signoria adjuterà il re, soa majestà l'ajuterà lei contra fiorentini, quali l'impromete danari per l'impresa de Milan et favor; et saria meglio la Signoria metesse la cosa di Pisa in le man dil re, perché fiorentini dicono l'averà, et il re non farà cossa niuna si non con honor de la Signoria, et dagando danari al re, il re li darà 300 lanze.