Item, esser zonto lì a corte monsignor Arzenton, qual è tutto di la Signoria nostra.
     
      Di Padoa di rectori, di 14. Di certi inconvenienti seguiti per il Campezo per la concorentia col Sozino etc. Et vene in questa terra domino Antonio Turcheto doctor citadin paduano, per la parte presa in pregadi che domino Antonio Francesco di Doctori legesse, quasi dicendo li era tolto il suo honor; tamen, nulla fece.
     
      Ancora vene do oratori di la comunità di Verona, domino Zuam Bevilaqua cavalier et domino Alberto di Alberti dotor, quali erano venuti per dolersi di Ulyxes scrivan di sier Hironimo Capello proveditor, che haveano ditto contra l'honor di quella comunità fidelissima, quali non sono aldidi perhò cussì presto.
     
      [208] In questa matina Zuam Alberto, el qual mai si partiva di palazo, fè dir a la Signoria come suo fratello Stephano, che ha un spirito in la ingistera, havia dito questo anno el ducha di Milan perderà la vita et il stato, si el ducha di Ferara non lo ajuterà, et per questo il suo Signor et il ducha di Milan solicitava l'acordo, et havia mandato per ditto suo fratello che andasse a Milan, el qual era andato con il ducha olim di Sora chiamato Sigismondo di Madama.
     
      In questo zorno a dì 15 nel consejo di pregadi fo posto parte. Ma prima fata la relatione per non vi esser el principe, per sier Polo Barbo savio di quello havia exposto Zuam Alberto, fu posto parte di mandarli Alvise Manenti secretario a Ferara, con il compromesso el qual durasse zorni 20, et che prima il ducha, cussì come ne havia promesso le tre cosse, zoè la libertà di Pisa che li resti le forteze excepto Ligorno, et ducati 150 milia in 10 over 12 anni a la Signoria nostra con fideiusione di anno in anno, et danari a' pisani di le intrate per conservation di le forteze, cussì etiam non debbi concluder senza voluntà et intelligentia nostra.