Item, haveano ricevuto lettere in la materia dil conte Federico dil Monte, et haver exposto al ducha, qual dice haver provisto, quanto aspeta ad haver mulli sul suo, dice non vi esser a Urbino 60. Item, si cridava marzocho e marzocho che prima si cridoe cussì, ma de caetero farà cridar palle, et haver mandato quel Baldisera era con l'Orsino su quel di Roma. Da Rimano haver vituarie con dificultà; perché quel signor è sdegnao per haver dà l'impresa di Val di Bagno al conte di Sojano suo inimico. Item, doman farano la mostra di le zente dil signor di Faenza et Manfron, et li darano danari et el resto darà le page; et hano ditto a l'Alviano la Signoria esser contenta fazi 1000 fanti con 20 per cento mancho; et cussì è restà contento et li farà far, qualli zonti qui se li darano danari. I nimici s'ingrossano a Popi dove fano capo, preparano scale per andar a Fransola; et il ducha, esso sier Piero Marcelo e l'Alviano erano stati a veder ditto [210] loco, et concluso non lo poter mantenir e per ingrossarsi l'Arno non si pol dar soccorso; vol ruinarlo e quelli fanti tirar via e ponerli su altro pozo vicino. Item, esser opinion brusar Lierna et Popi per esser d'importantia da esser tolti da' inimici. Item, hano pensier andar a espugnar certi castelli con fanti, con li qual hanno intelligentia et con donarli danari li haverano, ma era gran acque et continue pioveva. Li provisionati brexani erano quasi tutti fuziti, et Antonio Vascon et Zuam Alvixe Costa loro caporali hanno scrito siano svalizati a li passi.