Poi disse di presenti abuti, qualli presenterà ale raxon nuove: havia menato li soi cavali fino a Padoa qualli erano molto boni, e vendendoli si vadagnerano assai, havia lassà una mulla in Savoja a Zuam Dolze che la dimandò.
     
      Item, in fine disse, come il re havia il comandator di San Jacomo di Chalatrava et quel di l'Alchantera ch'è di gran intrada, et havia autorità abuta da pontifici di poter lhoro alteze dar beneficii eclesiastici più di 200, li qualli va per zornata dagando a li soi di la corte: conclusive, la richeza di Spagna è i signori e la Chiesia. La raina sta con gran pompa, ha le damisele, a le qual la dà danari et poi le marida, do di le qual in suo tempo havia maridate, dato ducati 10 milia in dota. Or venuto zo di renga et sentato sul mastabè di la Signoria, per el principe nostro de more fo laudato; et etiam il secretario.
     
      Et poi la matina seguente, a dì 18, vene ditto sier Domenego Trivixan in colegio a dir come monsignor il thesorier di Savoja si racomandava a la Signoria, et rigratiava di una lettera havia scrito ai rectori di Padoa in recomandation di suo fiol che ivi studia. Item, disse di la sententia di Aragon fata nel consejo contra la Signoria nostra, per il danno di la nave di Spagna, et come fu citato missier Jacomo Contarini doctor orator nostro tunc de lì più volte, et sarà di danno ducati 3000, le qual cosse il zorno avanti non havea referite.
     
      [1498 12 17]A dì 17 dezembrio, in colegio non fo leto alcuna lettera. Intrò li cai di X e tutti fono mandati fuora e consultono certe lettere abute, et poi fo ordinato pregadi.