Tercio: non quid incredulitas illorum etc. Poi si partì dicendo scriverà al suo signor. Queste tal parole li fo ditte acciò mai di la Signoria si dolesse.
     
      Vene do ambasadori di Chioza exponendo quel porto hora mai non poteva più intrar barze grosse si non si provedeva, et ordinato e consultato col colegio essi di Chioza dovesseno conzar la pallà di Lion, et per questo li levavano le decime; et fo mandato Alvixe Zucharin lì, el qual era venuto in colegio a oferirse di cavar ditto porto ita barze poria intrar. In questi zorni, la nave di sier Bernardo Barbarigo fo dil serenissimo, veniva di Candia con vini, volendo vegnir in questa terra, sul porto di Cigala si rumpete, et fo scrito per la Signoria a sier Alvixe Badoer conte di Cherso et Ossero in recomandatione di le robe etc. Et intisi di sier Beneto Zustignam savio a terra ferma, come al presente di questa terra, zoè de' venitiani, era solamente 12 nave di 500 bote in suso, che al tempo di quel missier Tomà Mocenigo principe nostro si trova era nave 350, ergo etc.
     
      È da saper sier Andrea Zanchani, va al Turcho con la galia di sier Simon Guoro, poi che steteno per il tempo alcuni zorni qui, a dì 17 di note feno vella; [226] menò con si per secretario Marcho Rigo. Et eri sera etiam partite li synici, vano in Dalmatia e Puja.
     
      In questa matina fo fato uno comito in Barbaria che manchava, capitano sier Andrea Baxadona; et fono balotadi do, et rimase Alvixe di Zuane, ave una balota di no, et paron rimase Stephano di Andrea cognominato Matana.