Vene Lucha di Lanti orator pisano, et mostroe una lettera di soi signori pisani di 4 et una di 6. Come si racomandano a questa Signoria, e haveano inteso la praticha di l'acordo, iterum si racomandano non siano abandonati. Item, era venuto uno lhoro comisario preso in Buti, in cambio di quel de' fiorentini era in Calze, qual havia ditto fiorentini esser in gran discusione tra lhoro et discordia, andavano cerchando arme. Item, come a lui orator era morto la moglie, rimasto 10 fioli e povero, et esserli manchato uno suo cugnato chiamato domino Joan Paulo Guilandi, qual havia uno beneficio di quelli di Rodi in Monopoli de intrada ducati 150; pregava la Signoria volesse di gracia darlo a uno suo fiol; et cussì, consulente collegio fo scrito a Roma.
     
      Vene sier Andrea Badoer exponendo haver perso quello havia al mondo per la so nave presa; voleva andar in Sicilia a veder di recuperar, et havea certo credito a li camerlingi; pregava fusse dati acciò potesse andar: ordinato veder.
     
      Et fo balotà la gratia di sier Silvestro Morexini di la galia dil trafego, per esser stà reincantada a suo danno, era debitor ducati 4000: che dovesse pagar la mità di tanti pro corenti, e 'l resto dil cavedal in anni 6; ave de sì 17 et di no 3, fu presa; bisogna mo expedirla in pregadi.
     
      Da Turin, di Zuam Dulze, di 13. Come non havia cossa di momento, o per non esser o perché quelli di la corte se schivavano a dirli. Era fama il re di Franza havia tolto a gratia monsignor di Verge, tamen havia parlato con il Bastardo: dice haver sue lettere non esser seguito ma spera sarà, per haver il re di Franza e il re di romani perlongato le [230] trieve sino a pasqua con denomination de li adherenti; et che soa signoria voria la pace universal sì de' oltramontani come de' italiani, et maxime per le cosse di Pisa; et il secretario averli risposo e dito la raxon di la Signoria nostra.