Item, come esso sier Domenego Malipiero con li altri di l'armada haviano ricevuto gran contento dil partir di sier Simon Guoro; solicita sia mandato de lì, et lui dimandava licentia; et come Piero Rizo corier era zonto con lettere e danari con le fuste; et di la lettera di sier Vicenzo Valier nulla dice; et concludeno che non venendo danari quelle fantarie si perderano.
     
      Di sier Vicenzo Valier proveditor sora i stratioti, data a Pisa a dì 16. Ringratiava la Signoria nostra di la soa electione sora i stratioti, offerendosi far etc., et scrisse molto brieve; et per una soa mi ringratioe di haver fato sia a questo oficio, cognoscendo haverlo da mi, dicendo haver gratie inmortal.
     
      [242] Et per un'altra soa di 10. Par nostri havea inteligentia in Ligorno, et mandono Gorlin et Sebastiam a veder le mura, et che solamente 4 in Pisa era che sapesse la praticha; fono scoperti et la cossa andò in fumo, tamen in collegio nulla di questo se intese. Credo fusse in consejo di X.
     
      Vene Zuam Alberto da la Pigna venuto da Ferrara, et disse come il signor li havea ditto le nostre pratiche si sa per tutto, et cargoe zercha questo domino Aldromandino orator di esso ducha de qui, el qual perhò nulla di cosse di stato se impazava, et li disse sapeva la deliberatione etc. Et presentò una scritura scrita per lui, che par il ducha li dichi: Zuam Alberto, per far cossa a grata a la illustrissima Signoria, verò a Venecia, ma dubito disconzar la pratica; perhò li a parso mejo scriver a Fiorenza et a Milano per saper il voler lhoro; et che l'orator fiorentino, era lì, si volea partir, et lui l'havea retenuto fino venisse la risposta di Fiorenza la qual di brieve aspetava; et adviserà dil tutto; si racomanda al principe et illustrissima Signoria.