Et per collegio fo scrito una lettera al ducha di Urbin laudando questa sua deliberation et di quelli nostri condutieri et che subito se li manderia [245] danari e tutto quello li fusse de bisogno; et così al proveditor scrito in consonantia.
     
      Da Ravena, di 20. Manda alcune lettere abute dal conte di Sojano et di Jacomo Sacho; li danari era zonti; et scrivea sier Zuam Paulo Gradenigo che hora prospererano.
     
      Dil conte de Sojano, data a dì 17 a Monte Alto, al proveditor di Ravena drizata, . Come a dì 16 il proveditor per el barisello havia ricevuto li danari et comenzarà a dar a le fantarie, et in questo mezo era stà posto hordine che Jacomo Sacho vadi ad aquistar uno castello nominato Riolo, dove havea intelligentia, con li soi balestrieri a cavalo, el qual loco è la guarda di tutto il paese; et harà poi Charesto et Urlato, el qual uno abuto l'altro si renderà, e si potrà scorer in cao di la valle, et Chiriacho dal Borgo harà carestia di tereno: el qual Riolo è in Galiada. Item, haver da Sojano abuto alcune some di grano, et che esso conte facea quello potea; havia scrito a do soi castelli li portaseno vituarie, zoè Pongo et Spinello; sperava far bene et prosperar in laude di la Signoria nostra, e più haria fatto se li danari fusseno stati. Item, dil passar de lì dil proveditor da cha Venier veniva di campo. Et Jacomo Sacho di 17 scrisse etiam in confirmation come si partiva per aver Riolo, prega Idio li presti ajuto di far etc.
     
      Ancora dil ditto conte da Sojano, data a Sorbano a dì 18. Si doleva dil zonzer li danari tardi, et quelle fantarie non haver voluto andar, et il proveditor li havea voluto dar pegno li soi arzenti; ha 700 fanti, 70 stratioti et li so balestrieri, et inimici non sono con mancho zente a l'incontro; ha preso 4 castelli per acordo, che per forza non li haria abuti cussì in pressa; lauda molto quel proveditor Gradenigo di ogni bona parte; spera tutto succederà bene, né lhoro lasserano di far etc.