Item, vene di sier Zuam Paulo Gradenigo di 18 a Sorbano, et di Rimano dil secretario de 18, le qual per esser l'hora tarda non fono lette; ma è in consonantia di quanto si fa.
     
      [1498 12 22]A dì 22 dezembrio, in collegio, fo aldita la mojer dil quel Jacomo Savorgnam condutier nostro di 100 cavali, morto a Pisa, la qual fo fiola di domino Matheo da Santo Anzolo da Crema, et vene con do putini et do fie picole, belissime creature, et suo fratello domino Anzolo Francesco da Santo Anzolo condutier, etiam lui nostro, et il cugnato sier Hironimo Savorgnam, vestiti di pani lugubri. Et butati a li piedi de la Signoria, pregoe suplicando essa dona che fusse dato provision per il viver lhoro et le fiole maridate, atento la fedeltà di suo marito che era [246] zentilomo nostro et morto a nostri servicii. Fè gran compassion al collegio; per il principe li fo ditto si consejeria etc., tamen, poi non li fo dato alcuna cossa: alcuni savii sentiva meter la parte, ma ussiteno di collegio.
      Vene Piero di Bibiena et portoe una lettera abuta dal magnifico Juliano di 16 da Bibiena. Scriveva in conformità di quello si havia inteso per le lettere di eri: come el ducha voleva star lì con lui; et narra il modo dil alozar dil campo a Borgo e Campi li Bajoni, a Montalone el signor Carlo Orsini, a Mignano li faventini, a l'Averna el signor Bortolo d'Alviano. Item, haver fiorentini non poter più durar nì star su la spexa, perché dovendo mandar una paga in campo, farano novità per non esser danari et converano far quello vorà la Signoria; et in la cità non si poteva più, et era venuto a lui uno cugnato di Batista Serestori uno di dieci, el qual lo conforta a perseverar: lo ha rimandato indriedo per conforto de li amici, dicendo la Signoria non vol lochi de' fiorentini, ma li presi sono soi, et vol solamente remeter essi Medici in caxa.