[1498 12 24]A dì 24 dezembrio in collegio, fo la vezilia de Nadal. Lettere di campo da Bibiena di sier Piero Marcelo proveditor date a dì 17 a hore 9 di note; come 500 fanti de' inimici erano intrati in Manzano, dove alozava l'Alviano zoè la sua compagnia, et hanno svalisati zercha 80 de soi homeni d'arme con l'ajuto di villani dil loco; el signor Bortolo era a l'Averna, qual havia jurato quanti ne vien a le mano di dicti li vol apichar; si duol convegnir star a Averna, pur sta volentiera per far quanto ha voluto; il ducha d'Urbin ha mostrato haver gran dispiacer; tamen, esso signor Bortolo dice etc. El qual ducha ha ditto haver previsto questo; et hauto ducati 2200 per parte di la sua paga; la matina seguente mandava via li cavali inutili et chariazi; resta solamente uno cavalo grosso per homo d'arme, et il fameio et li cavali lizieri; e lì a Bibiena volea tegnir fin 800 provisionati, et vol li lassa una paga; havia esso proveditor terminato lassarla et lui andar a l'Averna per esser in mezo. Item, havia ricevuto lettere nostre di 10, drizate a tutti do li proveditori, le qual per il Venier a Santa Agata fu aperte; zercha le parole ditte per l'orator dil ducha che veniva fato pocha extimation in campo di lui, et havia dito al ducha, qual disse non li comesse dovesse dirlo a la Signoria né scrivesse tante cosse; e tuto procedeva da la gara era li in campo etc. Havia mandato ducati 1000 a l'Alviano a l'Averna, et a le zente erano a Monte Forte, Pratiego et Monte Cornaro alozate bisognava dar danari.