Da Milan, di l'orator, di 21. Manda lettere abute da Zuam Delze da Turin di 15 in zifra, et altre abute da Monferà di 7 de li oratori di Franza, pur in zifra. Item, come altro de lì non era se non esser fama quel monsignor di San Martin era ritornato di Franza re infecta; et le lettere di Franza fo le replicate, zoè le prime che manchava, et da Turin non fo lete per esser in zifra et l'hora tarda.
     
      Da Conejan, di sier Marco Antonio Barbo podestà, date a dì 22. Come per le pioze grandissime era caduto le mure di la terra in tre lochi passa zercha 220, aricorda si conzi. Et è da saper dicto locho, licet sia in trivixana, alias per el consejo di X fo separado da Trevixo; tamen fo scrito al podestà di Trevixo mandasse a veder la spexa, anderia a rifarle, perché era buono lochi nostri havesse mure.
     
      Di sier Vido Diedo baylo et capitano di Durazo, di 11 novembrio. Come per tutto risonava, si per via dil golfo di Patras come da Negroponte, el Signor turcho preparava grande armata et grande exercito per questo paexe di Albania, et ussirà per tutto quel mexe, etiam molti cegna a quel loco di Durazo; avisa non ha polvere, schiopeti, né vituarie; prega sia mandate. Item, voria da Corfù li fusse mandato una galia sotil. Item, zercha a sali; come [257] par sia stà concesso di gratia per la Signoria nostra a l'arziepiscopo di quel locho non pagi dacie di soi sali, et che 'l comprava la parte di lavoradori, et non volea pagar il dacio in danno di la Signoria nostra; or fo comesso a l'ordine nostro di mandarli qualche munitione, et cussì poi ne fo mandate alcune come apar.