In questa matina, pieno collegio, fo aldito sier Piero Soranzo era stato proveditor in Otranto, qual portoe un desegno et disse l'opinion sua, concludendo contra turchi quel loco non esser forte, né la rocha in quella forteza di raxom dovea esser. Accidit, pocho era, che morite il castelan sier Alvixe Sagredo, primo mandato per la Signoria nostra, per il consejo di pregadi.
     
      Da poi disnar fo la vegilia di Nadal. El principe andoe con li oratori in chiesia a lo oficio et a la messa juxta il solito.
     
      [1498 12 25]A dì 25 dezembrio el zorno di Nadal da matina, el principe fo a messa in chiesia di San Marcho, et da poi disnar con le cerimonie: portò la spada sier Polo Trivixam el cavalier electo podestà a Brexa, fo compagno sier Francesco da Leze q. sier Lorenzo; questa matina non andò el principe con solenità in chiesia, ma solum fu posto le zoie su l'altar, per li procuratori; et fo col principe l'orator di Napoli, di Milan, di Ferrara, di Urbin et di Rimano, el reverendo don Marco Malipiero comandador di Cipro, sier Piero Diedo zudexe dil proprio, et uno rector di scolari di Padoa di natione da Liesna, el qual etiam la matina seguente andò a disnar col principe non hessendo invitato. Or in questo zorno di Nadal in chiesia di San Marco, fo predichato per uno frate di san Francesco da la Vigna di nation bolognese, qual non fo bella predicha, ma in ultima disse di la justicia et dil pagar li marinari etc. Et compita, el principe andoe a San Zorzi juxta il consueto a vespero. Et il zorno di San Stephano da matina non andoe a San Zorzi come era ubligato, per esser vento, udite messo a San Marcho et andoe a pranzo con li oratori et Signoria et patricii invitati di li primi de la terra fino al n.° di 60, et questo si chiama il pasto di 41 che feno el doxe.