Et la lettera di l'Alviano data in l'Averna a lui mandata de 20. Nara la desgratia seguida de li soi homeni d'arme a Marzano, fo a hora di disnar, et li soi combatè per una hora con inimici sora le mure et si defendeano, ma li villani rupe le mura et introduseno inimici dentro, siché li preseno et svalisono 86 homeni d'arme et 4 fugite in zipon; era retenuto da li nemici uno suo nepote, et Zuam Batista con altro soi primi capi di squadra; li son restati solum 15 homeni d'arme et li balestrieri havea con lui. Item, li nostri esser in fuga, andavano a Castel Delze, voria esso proveditor vi fusse per retenir quelli fuzeno; el ducha è a Bibiena, el signor Carlo a Montalon, lui a l'Averna con 350 fanti e domino Paulo da Fuligno lo qual lauda assai; et il loco di l'Averna non esser forte; voria 1000 fanti, et che a questi bisogni fusse comandà uno homo per focho; dice che venendo inimici vol combater, et che quelli o gran avantazo o gran necessità li forzono a venirvi; li qual inimici erano a la Pieve et Caprese, et haveano comandato tuto Mugielo che per 8 zorni venisseno con vituarie; non sa dove anderano. Manda a la Signoria nostra uno suo messo domino Hironimo de Gagliosis de l'Aquila; etiam quel domino Paulo de Fuligno scrisse in consonantia; et per el simile el signor Carlo Orsino al ditto proveditor.
     
      Vene Piero di Bibiena et mostroe una lettera dil magnifico Piero data a dì 20 a Rimano a lui drizata. Come veniva qui el signor Antonio Maria di Sanseverino, li ha parlato vol far assa' cosse per la via di Siena; vol esso Piero li parli e sia con lui; si duol sia lì su l'hosteria, et il proveditor Marcello non li manda danari, e bisognava la Signoria provedesse [261] per li mulli, in caxo fusseno presi da' inimici per pagarli.