Da Pisa, di sier Piero Duodo proveditor solo di 17. Advisava di la sua egritudine zà zorni 62, pregava li fusse dato licentia; et fo terminà ozi meter in pregadi di darli licentia.
     
      Da Feltre di sier Bortolo Malipiero podestà et capitano, di 20. Si doleva come quel capo di schiopetieri de lì mandoe in campo, havia fato molte jotonie, e per la Signoria fo ordinà fusse retenuto.
     
      Da poi disnar fo pregadi: si reduse prima il consejo di X, feno capi sier Cosma Pasqualigo, sier Beneto da Pexaro e sier Nicolò di Priuli.
     
      Fo fato scrutinio et electo capitano di le nave armade sier Alvise Marcello fo di pregadi con sier [276] Troylo ... era stato capitano di le galie dil trafego. Rimase da sier Domenego Dolfin fo capitano di le galie di Barbaria e sier Tomaso Zen non fu provado; et aceptoe.
     
      Fo posto per li consejeri, atento la egritudine di sier ... Duodo provedador a Pisa, et esser zorni 62 sia amalato, siali dato licentia possi vegnir, et electo in loco suo quando parerà uno proveditor con li modi era lui: have 26 balote di no.
     
      Et perché alcuni savii di colegio per tutto questo mexe venivano a compir, quelli compivano volevano intrar su le cosse di Franza et il resto non li pareva ozi tempo, unde fo posto parte per sier Nicolò Trivixam e sier Marchiò Trivixam savii dil consejo di chiamar el consejo di pregadi doman per le cosse di Franza, atento che molti savii compivano. Fo contradita da sier Marco Antonio Morexini kav. consejer; rispose sier Nicolò Trivixam, poi el serenissimo principe nostro, cargando molto ditto sier Nicolò esser stà quello che per il vulgo havia fato intrar in le cosse di Pisa, perhò che lui non sentiva l'acordo con Franza, et confessò mai esser stà di opinion di far guerra con la sua balota, et poi have parlato si levò. Rispose sier Marchiò Trivixam, demum sier Antonio Trum, et tandem tutti li savii romaseno di consultar doman ditte materie in collegio, et vegnir luni al consejo con lhoro opinione.