El pontifice li rispose con stranie et superbe parole, e che 'l sapea non erano mossi da li soi reali ma per la mala information abuta da Gracilasso orator etiam yspano lì in Roma; poi li oratori introno a dir che Dio lo havea tochato in la morte dil ducha di Gandia, et a Valenza prima di farlo cardinal e disfarlo e farlo tuor moglie. Respose il papa con colera: "I reali vostri è stà più tochati da Dio che li ha spento la prole e posterità, et à dà altri per haver messo le man a le cosse eclesiastiche". Feno poi uno protesto su le cosse di re Federico, e che soi reali non era per suportar havesse alcun mal; il papa si fense da la villa, dicendo lo havia per bon fiol. Item, Gracilasso partir fato le feste e [280] ritorna in Spagna con pessima dispositiom dil papa, et parla publice; et come era lettere di Franza di 10 da Ginon, il ducha di Valenza esser zonto lì, et a dì 14 dovea arivar a la corte; si aspetava con desiderio la conjunction et conclusiom di la Signoria nostra con il re, et il papa la desidera, et era stato fin mo con dubito la Signoria non sii per reconciliarsi con Milan et prendesse aseto di le cosse di Pisa; ma la cossa era lentata come dicevano quelli fiorentini, Item, il re di Franza manda 100 bote di vin a donar al papa et artilarie, et ne li zorni passati li dete ducati 12 milia per pagar li fanti tien la soa guarda in Borgo, et li scrivea à bon voler, né soa Santità non dubitasse di Spagna per esser in bona pace con soa majestà. Il papa atende ad haver danari, e fin qui ne ha bona summa, et de lì se divulgava la Signoria haver tolto a' stipendii el signor Antonio Maria di Sanseverino; et il papa quel zorno havia dimandato si era con suo consentimento.