Da Ravena di sier Jacomo Venier proveditor, di 29. Manda una lettera abuta di l'Alviano di 27 da l'Averna scrita manu propria. El qual mandava de qui el suo domino Hironimo de Gagliofis da l'Aquila acciò fusse provisto al bisogno. Et per l'altra li scrive, nara molte cosse seguide da poi el suo partir, e dil danno hauto di 85 homeni d'arme, qualli [287] combateno et li villani aperseno le mure per alcune stalle in do lochi, e inimici introno e pur combatendo li preseno; tre ne hanno menati a Fiorenza, zoè suo nepote, el cavalier Orsino et Zuam Batista da Fano, li altri spogliati li relasono. Nara del pericolo si trovava, e haver protestato al ducha li mandi li alemani. Li ha mandà solum 150, in tutto ha fanti 450, sta con dubito, poi non hanno vituarie; in tre pasti lui havia manzà uno pan e bevuto aqua; tutti esser diventati magri e afamati per il fredo. Item, che inimici, essendo uniti come sono, dieno vegnir doman a dar la bataja a Mignano, e lui vol ussir con la inteligentia ha con Carlo Orsini e Montalone e darli adosso et è causato da la necessità. Item, nostri haver conzà el molino de Chiussi che pol masenar, et si havesse danari desvieria li fanti nemichi, quali non hanno auto danari da' fiorentini, et zà ne aspeta 100 spagnoli; voria le zente d'arme e quelle fantarie si puol havere subito si fazi inanzi, perché nel venir presto consiste l'honor di la Signoria et la salvation lhoro, et che la Signoria fazi far fanti a homeni da bene. Item, lauda domino Paulo da Fuligno molto; e lui facea fortifichar l'Averna e farle tre bastioni.