Di Pera, di sier Bernardo Zustignam de sier Francesco, di 8 novembrio al preditto baylo. Come il Signor havia fato meter a charena navilii 22 tra li qual tre nave di bote 3000 l'una et il resto la più picola di bote 200, conzava le galie n.° 25 tra le qual cinque galeaze grosse. Item, fuste grosse n.° 20, et in mar Mazor facea far galie sarano in hordine a tempo nuovo, a Galipoli son galie 60, a la Valona 20, siché adunerà 200 velle et ussirà certissimo chi dice per Rodi, chi per Puja e chi per Soria; manda uno orator al soldam con tre galie. Item, di uno corsaro Chiechosi, che a dì 29 octubrio con 2 fuste di canal di Negroponte prese una nave di zenoesi di bote 200, et dia vegnir el dito corsaro a conzarsi col Signor. E di l'exercito andò in Polana non si havea [292] altro, era andato ben in hordine, si dicea haver fato assa' prede de' anime.
     
      Di sier Andrea Gritti, di 9 novembrio, data in Pera al ditto baylo, scrita in parabula. Come il corsaro prese una nave di bote 200; vol dir el Signor fa armata di velle 200. Item, dice l'orator andava al soldam, homo degno, si partiva quel zorno, e per li garbugii sono per la via si armava de lì tre galie e fuste le qual anderano a levarlo a la Satalia et lo condurano al golfo di la Giaze dove dia desmontar e andar per terra, et il capitano di le galie è Richi, fo corsaro, e altre cosse non da conto.
     
      Da Lepanto di sier Piero Sanudo synico, di 1.° dezembrio. Lauda il proveditor Viaro morto, qual havia diligentia a la fabricha et cavatiom dil fosso, e di la subrogation di sier Hironimo Trivixam in loco del ditto, et che havia dato le primitie action sue a liberation di poveri opressi da li potenti, prestando grata audientia et ministrandoli sumaria justicia, acciò li subditi gustino il fructo de l'imperio di la Signoria nostra; havia revisto la camera richissima.