El principe li rispose, qual parlato sapientissime soa serenità andò via; iterum sier Polo Barbo parloe, poi sier Zuam Morexini savio dil consejo, demum, sier Antonio Grimani procurator, poi sier Constantim di Prioli savio dil consejo, et andò le parte 2 non sincere, 67 di no et 127 di la parte, et per esser hore do di note fo terminà non intrar in le cosse.
     
      [1499 01 04]A dì 4 zener in collegio. Vene l'orator di Milan per il qual era stà mandato, hessendo stà expedita la nostra deliberatiom a Zuam Alberto. Come eri nel senato era stà terminato per le parole di Zuam Alberto di mandar a Ferrara Zacharia di Freschi secretario nostro, a intender dal signor quello vol far in questa materia, et si fiorentini hano la bona voluntà dicono, si vedrà come sempre habuto questo stado, et che dovesse tenir secreto perché secretissime era stà terminato mandar. Et l'orator disse piacerli assai, alegando una auctorità de Santo Agustin ad Casianum zercha li mali seguiva di la guerra, e dimandò si volea scrivesse al signor suo: li fo ditto de sì; et pregò li fusse dato una posta acciò il signor suo li intendesse presto; li fo dato et scrito a l'orator nostro desse quelle sue lettere al signor.
     
      Ancora fo leta dita deliberation a Zuam Alberto, el qual insieme con Zacharia predito la sera si partì per Po e andono a Ferrara. Li fo fato la comission [299] per collegio intendesse l'opinion dil signor, et volendo soa excellentia vegnir qui con l'orator fiorentino, vengi. Item, che oltra le tre cosse havia ditto di far etiam che Medici havesse qualche condition; et fo scrito al vicedomino come mandasemo el tal secretario de lì secreto, et per bon rispeto lui non se impazi in nulla né mostri saper.