Item, sier Piero Duodo stava meglio imo esser varito, et insieme con il Malipiero ogni zorno provedeano a quello era bisogno.
     
      Di Cypro di sier Andrea Venier luogotenente, date a Nichosia a dì 9 novembrio. Scrive haver da sier Beneto Sanudo consolo a Damasco, di 27 octubrio, di la morte di Cartabei Lachmar signor di Damasco, judica sia stà tosegato. Item, come in quelle aque Arfani e Francescheto Novaglia corsari haveano fato certi danni, preso uno gripo di Famagosta con saoni. Item, quel rezimento haver cargato su la nave Soranza, patrom Francesco Tarlado, orzi moza 19 milia con ordine andase a Pisa. Item, nara il caso intravene la note di brusarsi lhoro medemi di la nave di sier Carlo Contarini, patrom Antonio di Stephani, come ho scrito di sopra. Item, laudoe misier Zuam da Ragona, e de lì esser comenzà le pioze quale bone per li formenti.
     
      Da poi disnar fo pregadi non fo il principe, e posto parte per alcuni savii di colegio di risponder in Franza, altri volea indusiar che di brieve si aria letere. È da saper tutta la cossa era su darli 100 milia [302] ducati over no: alcuni li volea dar etc. Parloe sier Batista Zustignam, sier Marco Zorzi savii a terraferma, sier Batista Trivixam el cavalier era di pregadi sapientissime contra tute le opiniom e ad ogni modo voleva la liga, poi sier Lodovico Loredan procurator savio dil consejo, poi sier Anzolo Barozi era di pregadi, poi sier Antonio Grimani procurator, poi sier Marco Antonio Morexini cavalier consejer qual non sentiva l'acordo, demum iterum sier Antonio Grimani, et andate le parte di scriver over indusiar, fo preso di indusiar di larghissimo, hore 41/2 .