Et come el dito scrivea al magnifico Piero venisse subito con li condutieri e fanti in lhoro socorso con vituarie, altramente anderano mal i fati lhoro; né vol indusio perché el bisogna, e volendo venir li mandi a dir che li verà contra. Et etiam Paulo da Fuligno scrisse, di 2, a la Signoria nostra questo instesso inimici farsi gajardi. Et bisognava fosseno presto i socorsi perché non poteano più durar.
     
      Item, per la lettera di 3, ditto sier Zuam Paulo Gradenigo scrive haver consultato col magnifico Piero, domino Astor Bajom, domino Hanibal Bentivoy et quel misier Dolze comisario dil ducha de Urbim, et terminato questa note mandar 500 fanti a l'Averna, quali porterano 15 in 20 libre di farina per uno. Item, hanno fato cernida de li homeni del ducha comandati, et hanno trovati da zercha 436 boni et li altri cernide; siché farano il forzo di socorer dicti lochi come ha dito.
     
      Di Marco di Santi vene do lettere di 2 et 3 date a Castel Delze. Prima haver dato a Astor Bajom ducati 600 perché non ne volse tuor mancho: al Bentivoy 200, a Jacomazo 100 e il resto havia mandati a Bibiena al proveditor per do homeni dil magnifico Piero, quali si haveano offerto andar a piedi per le giaze. Et dito magnifico Piero havia prestado ducati 1000, dice esser dil signor Carlo Orsino, siché sarano ducati 4000, Item, ha mandato la paga a quelli di [309] Monte Cornaro, etiam al Manfrom dete ducati 150, ch'è persona insaciabile, et si vanta esser el mior dil campo nostro. Item, à mandato a Pratiego dove è Alvixe Griego contestabile con homeni dil paexe danari, et quelli homeni comandati dil ducha di Urbim, quali hanno 18 caporali, ai quali ha dato ducati 81, et a 436 cerniti havia dato ducato uno et 7 marcelli per uno, che summa ducati 755. Et la caxon non è andato lui in campo è stà per dubito non sia preso e dato taja: conclude quelle cose vano malissimo e non poria andar pezo.