Item, era stato da esso ducha tutti li soi creditori, quali erano stà fati chiamar per lui in castello, et li ha ditto bone parole dicendo trovino modo et mezo di acrescer li dacii che era contento et di quelli satisfati, tamen tutti si partino malcontenti; si aspectava uno orator fiorentino, qual fu electo la vezilia di Nadal, si dicea esser lo episcopo di Voltera venuto noviter orator di Franza.
     
      Da Ravena dil podestà, di 5. Manda lettere di 3 dil conte di Sojano. Come inimici lo molestava, et la madona di Forlì era causa, et che il comisario fiorentino di Bagno voria trieva con lui, et suo fratello Malatesta esser a conzo con la ditta madona di Forlì, et il danno li facia el signor Octaviano di Manphredi a quelli confini. Etiam sier Jacomo Venier [311] proveditor scrisse, di 5, che a dì 7 monteria a cavalo, né voleva andar la matina per esser el dì di Pasqua.
     
      Di Alexandria lettere zercha quelle novità dil soldam, la morte dil qual sarà notada più avanti difusamente; solum qui noterò uno capitolo di una lettera scrita in Alexandria per Alvixe Mora a dì 26 novembrio, lo qual fo lecto ozi in pregadi.
     
      A dì 24 del passato significai quello era ocorso del soldam piccolo, et come el fo morto, et in suo luogo facto el fradelo de sua madre, zovene de anni 30 che apena sa parlar rabesco et turchesco per esser cerca anni 10 vene cum uno pezo di peliza a le spale et uno par de panche in piede nel paese, al qual la fortuna mostrò tanta prosperità che non solamente l'ha exaltato a tanto grado che anche, poi intrato in signoria, è stà trovato certa scosagna cum sarafi 8000 e altre casende cum grande valsente de robe, cossa che a niuno altro ha promesso essa fortuna, in modo che contadi e oro et altro che l'ha manzado de le cosse de' molti grandi che era atorno el soldaneto morto, el se atrova molto forte; et oltra di questo essendo morto Cartabei signor de Damasco, l'è venuto nova come el diodar fuora ussito cum favor et zente de Aliduli era in asedio atorno Alepo, et che è stà destinà Isubech armiragio grande et uno Tenibet Zumeli che sono i do vechioni, a cui benemerito veria el soldanadego, cum altri do armiragi de mille lanze cum mamaluchi mille per andar a defension di quel luogo, et cussì infallanter per tutta la settimana che intra, volantissime deno cavalchar; adeo che pro nunc el prefato soldam senza dubito de alguno roman insedià cum grande obedientia.