Di Marco di Santi, di 4, pur a Castel Delze. Come era partiti li 436 fanti con la farina, qualli andavano con sier Zuam Paulo predito, et li danari ha portati el signor Franzoto Orsino zerman dil magnifico Piero a piedi per le giaze sono, et li ducati 1000 ebbe imprestedo dal magnifico Piero prega siano resi, e de caetero se li mandi oro e non moneda per tenir mancho imbroio. Manda li conti de grosso di [317] danari dispensadi e le bolete erano a Bibiena soto chiave. Item, havia aperto le lettere drizate a sier Paulo Marzello in Bibiena, e visto il tutto, quelle mandoe per ditto sig. Franzoto.
     
      Da Brexa di retori. Mandavano certi danari in questa terra, quali veneno in proposito per le gran spexe era bisogno far.
     
      De Udine di sier Domenego Bolani luogotenente. Come notifichava certa ubedientia per sier Piero Michiel podestà di Monfalcon a soe lettere li mandava per caxon di certe lite con alcuni todeschi; et la Signoria have molto a mal; li fo scrito una lettera molto admonitoria per li cai di X, tamen pocho stete che dito podestà morite.
     
      Da Pisa di 20 dezembrio, di Lazarin da Rimano a la Signoria. Solicita sia mandato uno capo per esser partito de lì el governador.
     
      In questa matina in collegio fo balotà uno di savii dil consejo a pagar a l'armamento li ducati 1000 per le feste, in luogo di sier Polo Barbo, era intrato consejer da basso con sier Marco Zorzi savio a terra ferma, et rimase sier Zuam Morexini.
     
      Di Franza de li oratori, date a Synon a dì 18 et 20 dezembrio in zifra. Come a dì 17 introe el ducha di Valentinoes lì con gram pompa, ben vestido lui e la fameia che mai in Franza si vete la più bella compagnia, et essi oratori li fono contra, e poi la matina fono a sua visitation nomine dominii, e usate acomodate parole esso ducha rispose esser de la Signoria nostra per amor dil pontifice, et con soa santità et con la majestà dil re farà sempre quello sarà honor et comodo di quella, et altre parole etc.