Vene l'orator di Napoli, exponendo havia lettere di la maestà dil suo re, che pregava la Signoria concedesse ad alcuni cathelani, sta nel regno e viveano bene tamen sono marani, che potesseno habitar in le terre la Signoria nostra teniva in Puja e qui a Venecia; et non essendo el principe, per sier Francesco Marzello più vechio consejer li fo risposo si consejeria questa cossa, et andoe via.
     
      Et il messo dil principe di Salerno, era qui, non potendo haver audientia scrisse una lettera al principe: havia lettere dil suo signor qual era varito dil colico pur era restato amalato, e voria da la Signoria li fusse concesso potesse venir a Padoa per curarsi a quelli bagni, e dimandava la promissione promessa di misericordia per ritrovarsi esso principe in gran inopia et esser debito su quel de Sinegaja più de ducati 1500, e pregava la camera di Padoa li respondesse la provisione, et non volendo potesse stanziar su quel di Roma a uno locho dove era bagni, et pur non volendo la Signoria questo, fusse chiarito di quello havesse a far, per haver gran bisogno di viver. Et udita questa lettera, nium di collegio li parse dir altro, per non sentir darli nulla.
     
      Da li rectori di Brexa, di 8. Esser venuto lì uno corier con lettere dil conte di Pitiano date a Gedi, dicendo haver aviso le cosse nostre di Casentino andavano male, per tanto esso conte governador nostro si offeriva ad ogni comando di la Signoria andar lì in persona. Et che havea auto lettere da Bologna di misier Bentivoy, diceva esso conte averli tolto alcuni homeni d'arme soi, quali li tolse credendo havesseno licentia per esser stati prima con lui.