Fo disputato, et parloe sier Francesco Foscarini el consejer, sier Marchio Trivixam savio dil consejo, sier Polo Barbo fuora di collegio, sier Marco Antonio Morexini consejer, sier Lorenzo de Prioli l'avogador di comun, sier Lodovico Loredam proveditor savio dil consejo et ultimo sier Antonio Trum, qual hessendo in renga, vene lettere di Ferrara, qual fo lete et fo posto di indusiar, et andò le parte fu presa di scriver.
     
      Da Ferrara di Zacaria di Freschi secretario, di 11, hore 19. Come Zuam Alberto li havia dito el signor havia auto lettere da Milan, che il ducha li scriveva omnino venisse a Venexia o con l'orator fiorentino o senza, et che forsi a lui pareria mejo cussì; per tanto el suo ducha havia spazato per stafeta a Fiorenza a intender la lhoro opinion, per luni a dì 14 saria la risposta de lì. Et come era nova inimici di Casentino haveano intercepte lettere dil ducha de Urbim, et il proveditor di Bibiena scrivea a la Signoria non poteano più star et se volevano partir, et che lui secretario havia expedita questa lettera a Ruigo soto il nome dil Vincivera da Bologna, et erano importante mandasse subito de qui. Et è da saper nui tenivano tal cossa secreto, e tamen tutti lo sapeva etc.
     
      [1499 01 13]A dì 13 zener in collegio. Vene l'orator di Urbim et mostroe lettere dil suo signor di 4. Come stava in Bibiena di bon animo e voleva star lì, tamen solicita le provision e sopra tutto fanti.
     
      Da Bibiena di sier Piero Marcelo proveditor, in zifra di 2, 3 et 4. Et par quelle di 3 fusse stà intercepte, ma era replichate, lettere molto longe.