Item, in Bibiena esser vituarie per uno mexe, e lì voria tenir 150 homeni d'arme et altretanti cavali lizieri e li soi 1000 provisionati, e intrar o in Romagna over andarsi come saperà far a conzonzersi con li nostri di Pisa, et voria ruinar il resto di castelli pisani. E come lui havesse fato buso, spingier li homeni nostri avanti, zoè le zente d'arme, overo voria da cavalaro venir de qui.
     
      Di Bibiena di sier Piero Marcelo, di 5 et 7 hore 24 in zifra. Molto longa e fastidiosa per esser di sua mano e mala lettera. Come quella matina col ducha era andato a l'Averna, trovò il signor Carlo era lì con l'Alviano che volevano venir a Bibiena. Item, esser zonto il signor Franzoto Orsino lì a Bibiena a piedi venuto, et li portò ducati 3000 d'oro, etiam esser zonti 400 fanti di quelli dil ducha di Urbin pagati a lire 10 l'uno, et li caporali quali li portone raines 1333 e sacheti 15 farina, pol esser 3 in 4 stera.
     
      Item, el ducha vol star lì a Bibiena. Et haver ricevute lettere di la Signoria nostra in materia haveva danari e si doleva; risponde haver mandati li conti et haver uno colateral bergamasco, et il desordene di la fuga di le zente esser stà per tristizia e non necessità. Item, spagnoli voleno la paga over partirsi. Zanon da Cotogno contestabele è a l'Averna con 6 compagni; et uno Bernardin da Brexa contestabele è in ... et nostri tien pur ancora Vergareto; et haveano in Bibiena fata la descrition: era da viver per zorni 40 in la rocha.
     
      Era molte altre lettere ma non fo lete. Intrò li cai di X et mandono tutti fuora et lexeno tra lhoro alcune lettere.