E da poi uno amico li disse: si la Signoria vuol tuor el signor Antonio Maria di Sanseverino, non stagi più, perché si conzerà.
     
      Da Turim di 8, 9 et 11, venute ozi et lete nel consejo di X con la zonta. Le qual erano in zifra. Primo: come Placidio era venuto lì dicendo veniva a preparar alozamenti per la venuta di misier Zuam Jacomo Triulzi, vien lì per visitar el ducha di Savoja per nome dil re; dice haver scontrato misier Gerardino Boba per nome dil signor Constantin, et Jacometo primo camerier dil ducha di Milano vano in Aste per parlar con ditto misier Zuam Jacomo stravestiti, et fece un longo discorso. Et come lui Placidio tornò in Aste, el suo patron Triulzi li disse questi esser venuti per dolersi di la morte di misier Renato suo fratello. Item, in la lettera di 9, come havia ricevuto lettere di la Signoria, li comandava andasse in Aste a dolersi con ditto Triulzi di la morte dil fratello, et dovendo venir lì quella matina restoe de andarvi, et cussì vene, li andò contra 4 mia et mezo. Vene poi il ducha con l'orator pontificio et milanese, et la corte alozò in la caxa dil thesorier, et smontato che 'l fo esso secretario andoe da lui dolendosi nomine dominii, qual ringraciò la Signoria, et li disse poi rasonando di la fiola dil conte di Naxo in el fiol dil marchexe di Monferà. Item, si dolse dito misier Zuam Jacomo di la rota abuta nostri in Casentino; et lui secretario rispose non esser vero, nì esser stà tante zanze qual fu ditto; et che voria si adatasse la Signoria con il re, al qual havia scrito si spazi a concluder perché la Signoria ha più partiti.