Fo posto parte per li consejeri, zoè sier Francesco Foscarini et sier Marco Antonio Morexin el cavalier et io Marin Sanudo savio ai ordeni, atento le cosse nostre di l'arsenal andavano mal, che 'l fusse electo ozi in questo consejo uno terzo provedador a l'arsenal, con l'autorità che quello che per do di lhoro fusse facto sia fermo; et sier Lunardo Grimani proveditor andoe in renga a justificarsi di ducati 1000 prestati, etc. tamen non potendo dir altro laudò la parte; io andai in renga per justificarmi non havia ditto per dir mal; et la Signoria mi mandò a dir per Zorzi Negro secretario che non bisognava risposta; et cussì andò la parte 4 non sincere, 34 di no, 121 di la parte; et fono tolti 7. Rimase sier Hironimo Venier fo governador di l'intrade q. sier Beneto el procurator, qual non veniva in pregadi, ave 86 balote, da sier Hironimo Pixani fo capitano a Bergamo 77, et cussì introe.
     
      Ancora fo messo per li savii parte di scriver a Ferrara a Zacharia, come dovesse solicitar la conclusiom et statim rescriver il tutto; tamen, el consejo cridava li fusse dà licentia: ave 2 non sincere, 73 di no et 97 di la parte, et fo presa, et se nium contradiva et fusse posto dar licentia, avea tutto il consejo.
     
      [1499 01 19]A dì 19 zener in collegio. Vene uno messo dil conte Ranuzo di Marzano qual dimandava la resolution di la Signoria nostra zercha darli conduta, ziò chè el dimandava; et per el principe li fo dato bone parole con speranza, et expedito se ne andasse. È da saper quel conte Ranuzo era a soldo di fiorentini.