Item, messo per li savii, di risponder a Zacharia a Ferara che, volendo il signor venir in questa terra, havendo il mandato de' fiorentini in le man, overo l'orator fiorentino havendolo, semo contenti el vengi, et che eramo di una parola, et da non promuover altro: et have 23 di no e tutto il resto di la parte.
     
      Item, fo messo parte per li savii di scriver a sier Piero Marzelo, proveditor in Bibiena, confortandolo a star, laudandolo assai, e non si mancherà di provisiom; se li mandava danari, e preso di far 3000 fanti, e volendo mandar via li cavalli, fazi come li par, et potendo haver vituarie de lì, non restino di pagarli il triplo. Et damò sia preso che sia fato 3000 fanti, et have tutto il consejo.
     
      Item, fo messo, per tutti tre man di savii di collegio, una ripresaja di Fiume a instantia di sier Piero Lion per certi filadi, e fo presa.
     
      [1499 01 24]A dì 24 zener in collegio. Vene sier Zuam Bolani, venuto conte di Zara, disse haver fato justitia; di la camera non se haver impazato, ma lassà il cargo a sier Francesco Marzelo capitano; et di la forteza mia 20 lontana chiamata Nadino non era compita, e laudava assai fusse compita; et che quella madama Dorothea, fo mojer dil conte Carlo di Frangipan, che vicinava ben con nui, et che havia sententià uno ha scosso per formenti e megli mandati de lì zercha ducati 1000, et condanà in quelli. Il capitanio non fu in opinion, si chiamava Piero de Venturin, qual havia casso di l'oficio. Item, disse di Zuam Crovigno di Crovatia fo fiol di re Mathias, qual è imbriago da la matina a la sera.