Et è da saper era di man dil proveditor.
     
      Et in la lettera di Astor Bajom era una poliza de lì presi per nostri, zoè misier Leporeto da Fermo, misier Zuam Batista da Montepulzano, Bernardo di Albizi, Morgante fiorentino, uno di Fiesole et altri. Item la bandiera dil capitanio Gueriero.
     
      [364] Da Ravena di 21. Nulla di conto. Et di sier Zuam Paulo Gradenigo dil suo zonzer lì amalato, le qual non fo lete in collegio.
     
      Da Fuligno di sier Francesco Morexini el dotor; andava orator a Napoli, di 12. Come era zonto ivi con neve e via cativa, quella sera anderà a Spoliti. Et havea nova il re a dì 5 intrò in l'Aquila, et era partito e andato a Capistrano per andar in Puja piana; à scrito a soa majestà per saper dove trovarlo, anderà prima a Roma. Item, che uno Paulo e Nicolò Albanese quelle feste di Nadal havia fato de lì 500 fanti per nome di Zuam Paulo Bajom, zoè a Bevagno et uno altro loco, et come alcuni merchadanti de lì si erano venuti a doler di certa bararia fata per sier Zuam da Molin q. sier Thimoteo, et come haveano fato ripresaja contra merchadanti nostri.
     
      Da Roma di sier Hironimo Donado doctor orator et sier Francesco Morexini doctor sopra nominato, di 19, hore 3 di note. Ozi terzo zorno zonse ivi ditto sier Francesco Morexini: li andò contra li prelati nostri et la fameja dil cardinal Michiel. Eri fo in concistorio, et ozi erano stati dal papa, et li havia exposto latine post pedum oscula la optima disposition di la Signoria, et soa santità mostrò haver piacer, laudava la Signoria di mandar suo orator a Napoli, ringratia di le oferte e versa vice si offerisse; dimandò di le cose di Casentino, disse li lochi esser ben muniti, et etiam li disse di la praticha di l'acordo, et il ducha di Ferara dia a venir a Venecia con li oratori fiorentini: tamen saria mala nova per esso papa, pur dicea volea pacifichar Italia per atender a le cosse dil Turcho.