Item, esso sier Andrea Griti voria li nostri rectori ben confinasse con lui, e con Sanzach bei, e lì a Costantinopoli, et scrive di la nave Permarina nostra fu presa per corsari, carga di formenti, come havia inteso per lettere di 8 novembrio da Syo. Item, uno Scanderbech era stà fatto sanzacho di Bossina che era gran dignità.
     
      In questa matina fo divulgato a Modon esser morto sier Anzolo Gradenigo era castelan e proveditor nostro, tamen non si havia lettere in la Signoria; et poi vene dita nova esser vera.
     
      Da poi disnar fo gran consejo, et collegio non si reduse.
     
      [1499 01 28]A dì 28 zener in collegio, da Ravena di sier Lunardo Zustignam podestà, di 25. Come era venuto do caporali di Zuam da Feltre ivi, dicendo la compagnia esser levata per non haver danari; dei inimici non ha altro si non se ingrossavano, et havia ricevuto lettere di la Signoria li scrivea non sia tajato le pignete, perché pur soldati ne tajavano. Et avisa esser stà tajà fin qui 200 pie, et provederà non si tagli più; et circa il bosco di San Marco, dove è le legne, etiam sier Zuam Paulo Gradenigo da Ravena scrisse, et de alcuni condutieri nostri ivi erano alozati, le qual non fono lete.
     
      Da Castel Delze di sier Francesco Venier proveditor, di 25. Come havia ricevuto nostre lettere, con quelle andava al ducha di Urbin et a l'Alviano e l'Orsino; et erano gran imbrogii, conforta de caetero si scriva in forma de' brievi. Item, la Signoria li manda ducati 3000, tamen fu 4000, per mandar a Bibiena et altrove, et che li homeni comandati dil [373] ducha era di spesa e pocha utilità, et ducati 20 al zorno di spexa dil pan solamente che li dava aconto di la Signoria nostra e facea per tenir Pratiego e Vergareto.