E chi dice il Turcho ussirà per Corfù, chi per Rodi; et per uno venuto di Pera dice lì esser assa' maistri che calafatava nave et barze per l'armata.
     
      Di Alexandria di sier Andrea Duodo di sier Piero, di 21 novembrio, drizata a sier Bernardo e Beneto Zivran a Modom. De novo non habiamo salvo la morte dil signor soldam, morto insieme con li do fioli de Zuam cerchasso dal diodar Teni. Hanno fato concorsi, et perché per niuno è stà contradito, Campsam diodar grando suo barba è stà fato in suo luogo, e in lhoco de ditto diodar grando se ha vestito el diodar Teni sopraditto, e tutti i altri signori confirmati nei soi officii. Fo morto a dì 31 dil passato, essendo andato fuori dal Cayro ai monti de Faraon a spasso; steteno sin a dì 2 dil mexe a crear novo soldam aspetando Campsum Campsomie ussisse fuori, el qual più che mai se aferma esser vivo. Habiamo ancor inteso Cartabei signor di Damasco esser morto, et in suo loco el signor soldam ha vestito Zuam Bolat signor de Alepo, et in Alepo quel de Tripoli, e a Tripoli uno parente dil soldam.
     
      Da Corfù di sier Antonio Moro baylo et capitanio, di 8 et 12. Come sier Antonio Pasqualigo fo di sier Filippo, qual è maridà lì a Corfù, è stato a la Valona, dice esser galie et fuste n.° 32 tutte marze; che lo ha fato star di mala voja; pur si facea salnitri per terra, e Mustafà è lì; voria dalla Signoria nostra tornesi per poter far compir certe fortification a la terra. Et etiam ditto sier Antonio li à ditto aver scontrato uno ambasador dil Turcho ritornava di Puja, stato al re Fedrico, dice per dimandar le osse dil signor fratello dil Turco.