E da poi disnar fo collegio; et li savii si reduseno a consultar, et fo consejo di X simplice. Et consultando una materia, disse sier Ferigo Corner procurator savio dil consejo voleva, come una volta disse sier Andrea Vendramin fo doxe, pesse e vove.
     
      Da Milan di l'orator, di 26. Come quel zorno era venuto a trovarlo domino Francesco Bernardin Visconte et domino Baldisera da Pusterla, per nome dil ducha, dicendo il signor havia auto lettere dil suo orator, è qui, di 20, di la comunication li ha fatto la Signoria nostra zercha Zacharia; et che non sia tenuto in tempo; et il ducha dicea la Signoria nostra haver bona disposition e dava la colpa a' fiorentini che non si risolveano; non manchava da lui, el qual si doleva molto, et era stà pur quello havia fatto far a' fiorentini resti lhoro orator a Ferrara, che lo haveano revochato venendo il marchexe a Venecia, e che per lui non mancheria e havia scrito a Fiorenza. Item, esser zonto lì uno orator de' senesi, si dice vien per la partita dil sig. Antonio Maria per scusarsi etc.
     
      Da Ferrara di Zacharia di Freschi secretario, di 28 hore 4 di note. Come quella matina era zonto lì el cardinal Curzense, va Roma in pressa, vien di Franza; el ducha a cavallo lo andò a visitar a San [383] Zorzi e subito si partì. Item, esser zonte lettere da Fiorenza, da misier Manfreo di Manfrei orator suo, date a dì 26 hore 16, come li diexe li haveano dato risposta, zoè mandato a dirli per misier Francesco Gadi lhoro secretario, et in consonantia scrisseno a domino Antonio Strozi orator lhoro lì a Ferrara, in la qual risposta par la Signoria nostra cerchi l'acordo: ringraciono il ducha di la faticha, ma voriano in scriptis il capitolo di la justicia, e bisognava consulto, et che si haveano messi in esso ducha, et la Signoria cerchava nove cosse: conclusive tute longole.