Vene Piero de' Medici in collegio per caxa dil principe, et introe li cai di X e tutti fono mandati fuora, et credo tratasse qualche praticha havia con Paulo Vitelli: dimandò etiam danari havia imprestato a nostri in campo, et quello disse fu secreto.
     
      Et da poi disnar fo ordinato pregadi et consejo di X con zonta.
     
      Da Pisa di provveditori, di 23. Come le zente da povertà si haviano messo a la strada per viver, tolendo da amici et nemici, e fanno danni assai e intollerabili, né li val comandamento di signori; dicono tanto si val morir da fame come di altro; biastemano et dicono parole spaventose.
     
      Da Napoli di Romania di sier Francesco Bragadin et sier Scipione Bon rectori, de 14 dezembrio. Come intendeano per molte vie el Turco facea grande armata, chi dicea per l'Arzipielago, chi per Nepanto, chi per Rodi; tamen voriano munition per averne bisogno; et voleano atender a fortifichar quella terra.
     
      In questo pregadi fu posto parte per li savii di dar licentia a Zacharia venisse subito via di Ferara, et altri savii voleano dovesse ringratiar il ducha si parte, et uno savio da terra ferma solo messe che havendo lettere di Fiorenza che volesseno far etc. debi rescriver e vegnir col ducha qui. Fo parlato per sier Beneto Zustignam savio a terra ferma et sier Marchiò Trivixam savio dil consejo, et andò do volte la parte, tandem fu preso di largo la prima opiniom venisse via; et altre parti non fo messe: era el principe; fo chiamato consejo di X in cheba; poi li [387] savii dil consejo et quelli di zonta; et fo licentiato il pregadi et steteno fin hore 4 di note, et tutti questi fono come noterò qui di sotto, et prima: