[390] In questo zorno in pregadi introe el consejo di X con la zonta di eri, zoè in la materia dil banco di Garzoni che steva mal si non si provedeva; poi fo chiamato la zonta di danari per far le ubligatiom si per le decime come la caution di la parte di armar.
     
      Fo messo parte per li savii grandi terra ferma et di ordeni, et zuro a Dio fo mia opiniom, di armar le galie de caetero per mexi 6 et non più, et li sia dato paga di mexi 4 a le zurme quando si armavano, et di mexe in mexe siano posti ducati ... in le procuratie di la ubligatiom fata ozi nel consejo di X: acciò nel lhoro ritorno siano certi di esser satisfati, et non siano messi soto pena etc. overo mandati contra quelle galie verano a disarmar, come in la parte apar, et have tutto il consejo.
     
      Item, fo messo parte per li savii che li debitori erano al dacio del vin et a la mesetaria siano mandati a le raxon nuove, e che ditti oficiali a le raxon nuove debino vender li beni de li debitori a l'incanto do volte almeno a la septimana, et fiano electi per collegio doman do oratori al ditto oficio, e fu presa.
     
      Item, fu posto, per io Marin Sanudo et Zustignam Barbo savii ai ordeni, la expedition di oratori de Antivari zercha la fortification di la terra, et per 4 ani eramo contenti lassar lì tutta l'intrada di la terra, la qual fusse posta in una cassa, come apar in ditta parte, et sia mandato ivi Coltrin ingegner, et il podestà fusse pagato a l'oficio di Camerlengo di comun de caetero, et fusse visto per li sindici era fuora si sier Bernardo da Canal podestà presente havia danari in le man di sora bondante, de li qual fusse pagato il podestà andava etc. come in ditta parte apar, molto longa, leta et notada per Bernardim di Ambroxii secretario diligentissimo.