Et non voglio restar di scriver: come hessendone sta scriti a mia madre, per la comissaria dil q. sier Alexandro Venier per uno legato in ditto banco ducati 500, et io sapendo la cossa, ordinai a sier Lunardo mio fratello li trazesse et cussì fece, adeo la vizilia di la festa trete di banco li ditti ducati 500 et ave tanti ducati d'oro, ongari. Or questo banco fo levato del 1430; et si diceva lo ditto banco de sier Nicolò de Bernardo e compagni, qual sempre continuò, et questi Garzoni quali non erano zentilomeni nostri lo governava; et tunc scriveva sier Zuam Batista de sier Andrea in zornal non se poteva dir di più di questo bancho in Veniexia e per tutto il mondo, tamen quando fu comenzà il Montenuovo fo trato molti danari che erano in deposito ivi, et vien ditto Bortolo di Nerli fiorentino in 45 zorni havia trato forsi ducati 45 milia per mandar a Fiorenza etc. Et da anni 4 in qua ditto bancho abuto danno di le page de arzento, perhò che le compravano a do e tre grossi di più la marcha di li altri banchi; et domino Andrea di Alberti li dia dar ducati 10 milia a la camera d'imprestidi di pro ducati 20 milia, sier Zuam Viero et sier Andrea Balbi loro parenti li hanno intachati di assa' danari; hanno debitori ducati 45 milia de li qual ne son 10 milia di debitori cativi, in zoie e arzenti hanno ducati 15 milia, in stabeli ducati 43 milia. Et questi da cha di Garzoni disseno volevano pagar tutti, ma che volevano qualche tempo, atento tutti voleva trar li soi danari et lhoro non li havevano in contanti; et fo ditto bona causa fono i Lipomani dal bancho qualli etiam questo anno faliseno anche lhoro.