Item, esser venuto lì uno messo dil conte di Sojano, li avisava stava in pericolo, e havia scoperto un tratato che la madona di Forlì volea farlo prender, et era disperato, dimandava socorso de 400 fanti, et prometeva far assai cosse.
     
      Da Brexa di rectori, di 30. Come quella matina el capitano era partito per andar a Gedi dal conte di Pitiano a dirli la diliberation nostra che 'l vadi in Casentino. Item, haveano lettere dil capitano di Val Camonicha, li advisava come a dì 21 partì uno da Nodre loco dil re di romani, mia 30 di Borno di Valtellina, dice haver visto 8000 a piedi e pochi cavali per venir contra alcuni sguizari, di le tre lige dil episcopo di Cuora et altri sguizari, et havia veduto a Cimbro questi; et che a Monestier mia 15 de lì ditti sguizari erano adunati; et quelli di Borno havia scrito al ducha di Milan ne facesse provisione perché temevano.
     
      Da Gedi di sier Zuam Francesco Pasqualigo doctor et capitanio di Brexa, date a dì 30. Avisa dil suo zonzer lì dal conte di Pitiano, et averli ditto la voluntà di la Signoria nostra che debbi andar con 500 cavali lizieri et 500 provisionati fati per lui in Casentino; rispose esser molto aliegro e haver una volta dato l'anima a Dio et il corpo a la Signoria nostra, et li havia dati li ducati 4000 portati con lui tolti da Brexa; et soa excellentia havia ditto haver 100 ballestrieri a cavalo solamente, et che 'l resto menaria homeni d'arme a Ravena, li qual farà cavali lizieri, et che anderia prestissimo a Ravena, et poi più oltra sicome ocorerà; et che esso capitano resterà il zorno seguente lì per farlo expedir presto; et in consonantia dicto conte scrisse al suo secretario de qui come saria prestissimo a Ravena; el qual vene in collegio a notifichar questa volontà dil conte, come dirò lezendo più oltra.