Da Modon di sier Luca Trum synico, etiam di [394] sier Nicolò da cha da Pexaro proveditor di l'armada, i qualli tutti do scrivono esser morto sier Anzolo Gradenigo, era lì castelan e proveditor nostro, et lo laudono assai; et cussì fo electo in loco suo sier Marco Cabriel.
     
      Da poi disnar, el principe fo, justa il consueto, con la Signoria, oratori et cerimonie a Santa Maria Formoxa per terra a vesporo, et da poi disnar zoè da poi tornato, il collegio si redusse, et fo lettere.
     
      Da Castel Delze di sier Jacomo Venier, di 15 sera e di 29 do lettere. Come inimici haveano preso Chiussi, i qualli volendo andarvi a campo, nostri si reseno. Item, Morelo da Cortona è partido a la Pieve poi a Bibiena. L'impresa di Val di Bagno era stà abandonata et il signor Carlo Orsini vol duc. 200 quali li havia dati, et che spendeva ducati 6 al zorno; et Astor Bajon li à dito voler danari e non intende esser più obligato a servir la Signoria se non per fin habi la paga. Item, come el conte di Sojano li havia scrito la madona di Forlì zercha averlo in le man per far la vendeta di la neza.
     
      Da Gedi dil capitanio di Brexa sopranominato, di 30. Come il conte facea gran solicitudine, ne dimandava danari et si partiria de lì a dì 3 fevrer. Et fo scrito per collegio per le terre nostre dove havia a passar, dovesseno elezer do citadini per cadauna, qualli dovesseno andarli contra e proveder a li alozamenti. Et scrive esso capitano come manderà le zente per il Polesene, e voria haver il passo dal ducha di Ferara, et esso conte veria a la volta di Padoa e per li lidi anderia a Ravena.