In materia di biave et orzi, et di le provision fate per la venuta dil conte.
     
      Da Ravena, di primo. Come li condutieri, erano in Val di Bagno, sono ivi venuti e hanno abandonato l'impresa; è stà ditto inimici haver recuperato Sorbano e li altri lochi e il conte Lamberto Malatesta esser venuto a Sojano. Item, havia esso podestà mandato a far le cride chi vuol soldo vengino a Ravena zoè a Rimano e Faenza. Item, à mandato monition, era in quel castello, a Castel Delze; et ha nova per uno vien di Forlì che 'l marchexe di Mantoa veniva lì, et poi per un'altra lettera dice haver per uno messo vien di Mantoa, porta veludi a la duchessa di Urbim sorella dil marchexe, dice ditto marchexe esser per il suo paese a piaceri, e nulla preparation facea.
     
      Da Spalato di sier Simon Guoro proveditor di l'armada, di 17 zener, et etiam di sier Andrea [401] Zanchani orator, una lettera. Tutte do zercha la forteza di Clissa ch'è dil Ongaro, etc. Et sier Marin Moro conte adviserà il tutto, la qual forteza sta mal cussì. Item, havia mandato uno Lucha de Batistis citadin de Spalato al sanzacho a dolersi di la incursion fata contra sibinzani, e mandò la copia di la lettera.
     
      Da Trani di sier Alvixe Contarini governador. Col desegno di la terra; la qual non fu leta. Post fo gran consejo.
     
      E in questa matina sier Marco Antonio Contarini et sier Antonio Da Canal messeno banco, videlicet sopracomiti primi tochava ad armar.
     
      [1499 02 04]A dì 4 fevrer in collegio. Erano li capi dil consejo di X, zoè sier Francesco Mozenigo, sier Piero Balbi et sier Piero Loredam, et mandati tutti li altri fuora non intravano nel consejo di X, vene sier Andrea di Garzoni dal banco con soi fioli e nepoti, et disseno voler pagar tutti, et come di la vigilia di Nadal in qua haveano dato fuora di quel banco in contadi ducati 128 milia, et dicitur el tuor a tre per cento che faceano di haver contadi li ruinavano.