Et in conclusione, non dieno dar più di 95 milia ducati come diceano, et haveano assa' stabele, Monte nuovo et tanto che con tempo pageriano tutti; et che ditto bancho fu levato del 1430 a dì primo april. Et ringracioe la Signoria et lo excelso consejo di X di averli fato salvoconduto; et che li soi creditori voleano far cai di creditori; cossa di sua gran vergogna. Or andati fuora, restoe solum sier Zuam Batista di Garzoni, il qual però intrava in collegio per caxa dil principe, et chiamati dentro tutti li creditori, quali erano di fuora di collegio mormorando assai etc. Et cussì chiamati nui altri di collegio, el principe parloe di la bona volontà havia questi Garzoni di pagar ogni uno, et da può pasqua piacendo a Dio voriano dar principio, et haveano molti debitori a scuoder; confortandoli a taser, et che voleano tutto il suo ubligarlo ai creditori, et li danari scuoderano ponerli a li camerlengi nostri con una chiave lhoro et un'altra li cai etc. E pur li creditori dolendosi di non haver li soi danari, voleano far cai di creditori per veder li libri. Et cussì alquanto tasentati, ditti Garzoni andono al banco; non perhò scrisseno né faceno altro, ma mal visti da tutti, et gran dolor havia sier Andrea che era il vechio et molto homo da ben. Et per collegio senza altra balotation fono electi do, i qualli per nome di la Signoria dovesseno esser quelli tenisse la chiave di danari, et fosseno in loco di cai di creditori, a veder libri di ditti Garzoni, zoè sier Nicolò Foscarini fo capitanio a Verona e sier Tomà Mocenigo fo podestà e capitanio a Trevixo de sier [402] Nicolò procurator, et il Foscarini renoncioe tal cargo come dirò.