Et per l'altra di primo fevrer: che hessendo in San Domenigo el governador e fratello, lo chiamoe dicendo la Signoria mandò Zorzi Negro, poi lui Marco Bevazam a tempo che bisognava, e a hora che 'l vadi via, et che non li dava licentia per nium mal, ma perché el star suo de lì non è più a preposito. Et il secretario rispose: si dal ducha di chi era Zenoa, o da lhoro, o da la comunità, li deva tal licentia. Risposeno: "non zerché altro, da nui vi la demo". Et il secretario rispose gajardamente non si partirà senza licentia di la Signoria a la qual scriveria; et che questo medemo haveano fato a l'orator pisano, era de lì, che li detono licentia, et è verifichà quello per avanti li era stà ditto.
     
      Da Brexa di rectori, di 3. Come il conte era in hordine, et la matina seguente cavalcheria e dormirà a Peschiera ozi; le zente è aviate.
     
      Da Gedi di sier Francesco Foscari el cavalier, di 3 da sera. Come quel zorno era zonto lì; et usate le parole al conte si conveniva, qual ringracioe la Signoria nostra; doman partiva per Peschiera con 106 homeni d'arme, 160 balestrieri a cavallo et arà li 500 fanti in hordine. Et esser venuto lì domino Bernardino da Martinengo e altri citadini brexani per honorarlo per il paese; vol a Verona li fanti monti in burchio.
     
      [407] Da Ruigo di sier Marin Zustignam podestà et capitano, di 4. Che si doleva che 'l podestà di Lendenara et quello di la Badia non volea mandar li danari doveano mandar in quella camera, ma pagavano loro et senza bolleta. Item, haver auto lettere di Ferara: el signor deva il passo al conte, ma vol vadino a pocho a pocho.