Da Cità di Castello di Marco di Santi de 26, qual era lì prexon, a la Signoria nostra scrita. Come Frachasso li havia dato taja ducati 4000, et per esser amado di la Signoria li ha dito nulla pagerà, et che havia bona compagnia, racomandandosi a questa Signoria nostra.
     
      In questo pregadi referì Zacharia di Freschi secretario in renga la relation, come disse in collegio, per esser tornato di Ferara.
     
      Fo messo parte per li savii dil consejo e terra ferma, et ordenà di dar licentia a Marco Bevazam, era secretario a Zenoa, atento li era stà data etc. Have niuna di no et tutto il consejo.
     
      Item, fo messo parte per li savii che, atento era stà fato molta suspension di le vendede di le caxe [410] de li debitori di la Signoria et impazavano il scuoder con danno di la Signoria, che tutte le suspension siano casse et anulade, et la Signoria nostra possi haver il suo; et fu posta etiam per li consejeri e cai di 40. Ave 10 non sincere, nulla di no, 135 di la parte.
     
      Item, fo scrito per collegio a l'orator nostro a Milan, di la risposta fata per el principe a l'orator dil ducha questa matina, et in consonantia le dificultà di l'acordo. Fo licentià pregadi, e si reduse consejo di X.
     
      In questa sera zonse qui sier Zuam Paulo Gradenigo, venuto da Ravena con febre quartana; non potè vegnir a la Signoria.
     
      Et è da saper che sier Nicolò Foscarini vene in collegio con sier Tomà Mocenigo, et ditto sier Nicolò refudoe dicendo non havia voluto cargo di la sua cassa nonché quella di altri: et fo electo a vece in loco suo sier Marco da Molim fo podestà a Chioza, et aceptoe.