Da Corfù di sier Nicolò da cha da Pexaro proveditor di l'armada, di 13. Replicha quello scrisse per il passato di l'armata dil Turco; et manda avisi abuti di Pera di sier Andrea Griti di decembrio, abuti per avanti; et come era lì con quatro galie sole. Le qual lettere non fo lete.
     
      Di sier Antonio Moro baylo e capitano, di 13, in questo tenor. Et come a bocha chi vien di Constantinopoli dice de l'armata grande fa far il Turcho, chi dice per Rodi et chi per Corfù, e Camalì è soprastante a farla lavorar.
     
      Dil rezimento ditto, di 14. Come haveano fato lavorar atorno la cità e castelli e atorno il Butintro e la Parga, lochi importanti, et pocho li resta; non hanno danari da spender, rechiedeno tornesi di la sorte mandoe la mostra. Item, hanno speso in le forteze ducati 150 ogni mexe, et voleno do bombardieri. Et fo terminato mandarli 10 bombardieri et di la polvere; et io dixi a li capi di X facesseno far tornesi; in la zecha ne era alcuni de fati, quelli fici mandar via, e farne di altri.
     
      [1499 02 09]A dì 9 fevrer, in collegio. Vene domino Nicolò Ariano prothoiero di la Morea, vestito a la grecha, insieme con Alvise Sagudino secretario, qual sapea la lengua, et era stato secretario al Turcho, et 4 altri in sua compagnia. Et venuto in collegio, sentò apresso il principe, et presentò alcune lettere dil Signor turcho in grecho, et una di sier Andrea Griti, date in Pera di avosto. Par vengi per richieder l'almadaro et li danari, ch'era carazaro dil signor in questa terra retento etc. El qual prothoiero, benché sapesse la lengua nostra per esser stà qui aliter con li Pexari da Londra, tamen parlava in grecho, et era interprete ditto Sagudino.