Al presente l'è parso a la Porta del mio imperio un musulman el suo nome Mechemetis, et ha narado come le do sorele e una neza che fo tolte de là per schiave al tempo che fo scorzizado un cavo de la Natolia, et adesso se trovano de là libere, et vui non le lassate vegnir, unde de là vien al presente suo fradello, et lassatile vegnir, da può che le son libere, segondo che femo ancor nui a li vostri. In Constantinopoli a dì 24 dil mexe di avosto. Et se sono altri mussulmani che sono liberi, comandé che abiano libertà de vegnir secondo che femo ancor nui a li vostri.
     
      È da saper turchi non scrive il milesimo.
     
      Di Arbe di sier Piero Boldù conte, di 1.° fevrer. Come havia nova turchi in Polana, con cavalli et persone 120 milia esser andati, et quel re dubita molto, et havia mandato in Boemia le robe, et ha 30 milia cavalli. Et come el conte Anzolo di Franzipani havia mandato uno secretario lì, et vol dar Segna a la Signoria, et vol ajuto contra turchi; et li à risposto la Signoria al presente era implicata in le cosse di Pisa etc. Et il principe con li savii mormoroe molto di tal risposta fata; et li fo scrito non se impazi, ma alda et scriva et aspeti la risposta nostra, et non dagi lui. Et in questa matina altre lettere non era, che era mirum quid.
     
      Et fu facto pagador in campo sier Homobon Griti q. sier Batista, lo qual io tolsi, et il scrutinio sarà notado qui avanti. Item, fo electi do exatori a l'oficio di la raxon nuove per scrutinio, et rimase sier Andrea Bon, era zudexe di petizion, q. sier Antonio, e sier Tomà Donado el 40 criminal, q. sier [423] Nicolò quali tutti do acceptono; tamen non potevano cussì atender per li lhoro oficii, et sier Homobon Griti refutoe, et fu fato in loco suo come dirò.