Ora tutto il collegio li dispiaque, fo comandato credenza, et data la dita lettera ai cai di X, volendo mandar per dito canzelier.
     
      In questa matina sier Faustin Barbo renoncioe pagador in campo, et in suo loco fo electo sier Sigismondo di Cavalli, qual fece gran pratiche e del suo romagnir fo gran parlar in la terra: acceptoe et fu expedito subito. Et da poi disnar fo collegio. Questo è il scurtinio:
     
      Electo pagador in campo.
     
      Non sier Marco Marzelo, q. sier Jacomo Antonio el cavalier, per esser suo fradello proveditor.
     
      Sier Francesco Dolfin, fo cataver, q. sier Zuane 7:15
      Sier Vetor da Leze, q. sier Priamo 6:16
      Sier Francesco Baxejo, q. sier Piero 2:20
      Sier Trojam Bolani, fo patron di galia, q. sier Hironimo 6:16
      Sier Zuam Balbi, fo a l'armamento, q. sier Marco 8:14
      Sier Vido Morexini, fo cao di 40, q. sier Nicolò 11:8
      Sier Vicenzo Contarini, q. sier Hironimo 9:13
      Sier Marco Antonio Contarini, de sier Priamo 9:13
      Electo sier Sigismondo di Cavalli, de s. Nicolò 12:10
      Sier Domenego Griti, el 40 zivil, q. sier Francesco 10:11
      Sier Zuam Alvise Navaier, fo al dazio dil vin, q. sier Francesco 9:13
     
      [434] Et havendo scrito di sopra di le lettere di sier Francesco Morexini dotor orator al re Federico nostro, perché li manchava queste particularità, quivi saranno poste. E in la prima, di 4 fevrer da Villafrancha: come el re voleva andar a Julianova; à mutato il pensier e va a Villafrancha, et domino Alexandro fo fiol dil ducha Galeazo Sforza havia il dominio abuto per re Ferandino, or al presente a requisition dil ducha et de li citadini non vol questo re confirmarlo, imo li ha dato licentia.