Da poi disnar fo gran consejo, et per esser prima domenega di quaresima fo stridato i ladri, per sier Lorenzo di Prioli avogador di comun per numero 6: el primo sier Piero Bon q. sier Benetto era al formento in Candia, sier Marin Pasqualigo fo al dazio dil vin, Domenego di Martim, Jacomo Zivram, Jacomo Basilisco et uno Pizamano scrivan al sal.
     
      Da poi consejo si riduse la Signoria con li savii in collegio per lezer lettere venute questa matina di Franza, erano in zifra. Et prima:
     
      Da Milan di l'orator, di 15. Manda lettere vien di Franza, abute per via dil signor Constantin. Et il ducha ha fatto la mostra di 200 cavali lizieri, quali manda, con altri 300, contra il conte di Pitiano, zoè li 300 mandava il marchexe di Mantoa; et è partito misier Galeazo Visconti, va in Aste da misier Zuam Jacomo, ad quid non si sa. Eri zonse lì domino Francesco de Montibus orator dil re Fedrico.
     
      Di Turim dil secretario, di 12. Come era rimasto lì el reverendo thesorier e il magnifico canzelier, poi partido el ducha et il resto; desidera haver licentia. Et esser nova in li merchadanti el re havia fatto comandamento sotto pena di rebelliom tutte le zente di là guardason di Aste stagino in hordine, et le biave di Provenza non se trazano, et à mandato a catar li alozamenti et deputato il viver per 600 lanze che 'l vol mandar in Aste. L'orator di Milan è lì amalato, il thesorier parte fin 10 zorni, va a la corte, resterà il canzelier con alcuni dil consejo. Item, domino Guido de Nigris partì de lì per Franza; el maistro di caxa di madona Bona è stato a Milan; et che la licentia data al secretario nostro a Zenoa, et esser stà mandato via, ha dato molto che dir: dicendo de lì via si darà da far a Pisa.