Poi sier Cosma Pasqualigo e nevodi, piezi i Lipomani dal banco: ave 16, 4; poi sier Sebastiano Moro q. sier Damian, et in tre dì si ubligava dar piezaria: ave 9, 11. Et rimase sier Cosma Pasqualigo, et messe patron sier Vincenzo suo fiol.
     
      Item, fono alditi li oratori di Pinguento contra quelli di Caodistria, dolendosi non dia far con lhoro in armar la galia, et fo dito vadino a far per questa volta, atento il bisogno di la Signoria nostra.
     
      Ancora fo scrito a Bologna, per collegio, a Antonio Vincivera secretario, si debi doler a misier Zuane Bentivoy di haver dato il passo a le zente di Milan. Item, io fici balotar certe monitiom, fo mandate a Puola per Mormaram. Item, fono alditi li oratori di Citadela in contraditorio con domino Davit secretario dil signor Antonio Maria, et nulla fo terminato.
     
      [1499 02 19]Adì 19 fevrer. In camera dil principe intrò li consejeri et savii con li cai dil consejo di X, et fono serate le porte da basso che parse de nuovo a tutti; et fo perché si ebbe nova di la conclusiom di la liga: zoè, come dirò di soto; et fo comandato gran credenza tra lhoro, aspetando le lettere di oratori, et etiam per non interomper le pratiche di Ferara.
     
      Da Ravena, di 16. Come sier Lunardo Zustignam podestà havia inteso la sua electione di andar col conte in campo, ringratia di tali honori, anderà volentieri consignato il rezimento, et prega sia tenuto pocho. Et fo expedito per collegio Marco di Santi andasse a Ravena et saria bon secretario di dito proveditor.
     
      Di Rimano, di Zorzi Franco secretario, di 17. Che Marco di Rimano havia fato la compagnia et bona, et il signor ha discoperto un altro tratado.