Et quelli vorano far nave grosse li sia prestà de li danari di la Signoria nostra ducati 3000.
     
      Noto. In questi zorni, uno Hieronimo senese, diceva a l'improvisa su la lira, fu retenuto per el consejo dei X per sodomito, et haver usato con tre puti, al qual non si potè dar corda, et fo butato il collegio, tochò a sier Polo Barbo consejer, sier Domenego Trivixan cavalier avogador, sier Francesco Mocenigo cao dil consejo di X et sier Nicolò di Prioli inquisitor: li fo dato il fuogo et nulla confessoe, et haveano le cosse provade; or tandem fue expedito, zoè bandito, ita che scapolò la vita soa.
     
      In questi zorni gionse in questa terra Marco Bevazan secretario nostro stato a Zenoa, et era di collegio, tamen mai non referite in collegio, di Zenoa, alcuna cossa.
     
      [1499 02 26]A dì 26 fevrer. In collegio, fo gran neve, adeo non si reduse la mità del collegio; et vene Piero di Medici per caxa dil principe et stete alquanto con li cai del consejo di X et li altri fono mandati fuora, credo in qualche praticha col Vitelli.
     
      In questo zorno sier Jacomo Contarini de sier Piero introe proveditor sora l'armada, in luogo di sier Alvise Bernardo.
     
      Da Bibiena di sier Piero Marzelo, di 19 in zifra, venuta eri sera. Come l'ultime sue sono di 10. Da poi quelli del ducha d'Urbin si volseno partir, essendo compito ozi li 3 zorni, et exortavano il magnifico Juliano dicendo, lo meneriano seguro via, tamen el non volse andar, dubitando. Et esso proveditor mandò a Castel Delze a dimandar Ramazoto et li fanti di l'Alviano, quali non erano ancora venuti.